Wednesday, July 29, 2009

The real reason behind Emomali Rahmon's appeal Сабаби аслии илтиҷои Раҳмон аз мардуми Тоҷикистон

Тақозои ногаҳониву нодири раиси ҷумҳури Тоҷикистон Эмомалӣ Раҳмон аз мардум барои захира кардани маводи ғизоии дусоларо бисёре аз расонаҳо ба масхара кашиданд, ки чӣ гуна мардуми камбизоате, ки рӯзашро ба сахтӣ мегузаронад, барои ду сол маводи ғизоӣ, дурустараш гандум захира мекунад. Аммо ҳеҷ яке аз ин расонаҳо сабаби ин “илтиҷои” ногаҳонии Эмомалӣ Раҳмонро нагуфтанд, фақат ба он гуфтаи Раҳмон бовар карданд, ки “бӯҳрони иқтисодӣ ва ҳам офатҳои табиӣ таъминоти аҳолӣ бо маводи ғизоиро дар бисёр кишварҳои ҷаҳон мушкил кардааст ва ин раванд минбаъд низ идома меёбад.”

Баҳонае хубе барои чунин илтиҷо аст, ҳарчанд имсол бино ба тахминҳо ҳосили гандум дар ҷаҳон назар ба солҳои гузашта хубтар хоҳад шуд. Зоҳиран сабаби муроҷиати Раҳмон на бӯҳрони иқтисодӣ аст ва на офатҳои табиӣ, сабаби муроҷиати ӯ нигаронӣ аз иқдомоти ояндаи Русия ва Ӯзбакистон аст, ки дигар на тоби шунидани ҳарфҳои Раҳмонро доранду на тоби дидани иқдомоти ӯро, ки мехоҳад, Русия дигар қавлу ваъдаҳои болобаланди дурӯғро канор гузорад ва дар Тоҷикистон ягон кори амалӣ кунад. Эмомалӣ Раҳмон ҳамин рӯз ба Дмитрий Медведев хоҳад гуфт, ки бас аст, “замини Тоҷикистон бесоҳиб нест ва барои пойгоҳи низомиат бояд пул бидиҳӣ” ки ин талаб албатта Дмитрий Медведевро асабонӣ хоҳад кард, ки кишвараш пул надорад, ба бознишастаҳояш ҳаққи бознишастагӣ бидиҳад. То се соли дигар замони ҳузури нерӯҳои Русия дар Тоҷикистон хотима меёбад ва як рӯзномаи маҳаллӣ ҳам гуфта буд, ки идомаи ҳузури онҳо “ҷиноят” ба зидди миллати тоҷик хоҳад буд. Дмитрий Медведев ба ин ҳам асабонӣ ба Тоҷикистон меравад, зеро дар он кишвар дигар ба забони модарии ӯ ба мисли пешина эҳтиром намегузоранд, дигар номи забони русиро дар Қонун доир ба забони давлатӣ намегиранд. Ин кори Эмомалӣ Раҳмон ончунон маҳофили сиёсии Русияро асабонӣ кард, ки ошкоро таҳдид карданд, кафши садҳо ҳазор муҳоҷирони кории тоҷик, ноноварони садҳо ҳазор хонавода дар Тоҷикистонро, пеши пояшон мегузоранд ва ба гуфтаи Владимир Жириновский сиёсатмадори миллатгарову оташнафаси Русия дари ин кишварро “бо виза ба рӯяшон мебандад.” Эмомалӣ Раҳмон хуб дарк мекунад, ки Русияи заъиф, ки ҳоло танҳо бо шиору таҳдид мехоҳа “азаматашро” нишон бидиҳад, ба ҳар кор қодир аст. Танҳо як амри шифоҳӣ кофист, ки пулиси золиму олуда ба фасоди Русия азияту озори муҳоҷирони тоҷикро шурӯъ кунад, хадамоти муҳоҷирати Русия ҳам пули набударо пайдо карда ҳазорон муҳоҷирро тӯда тӯда дар ҳавопаймову қатор ба ватани азизу бевафои онҳо ба Русия баргардонад. Эмомалӣ Раҳмон инро хуб медонад ва барои ин далеле даркор нест, танҳо кофист ба Гурҷистон нигаред, ки Русия бераҳмона пора порааш кард.

Эмомалӣ Раҳмон ғолибан ба ғавғову ҳаёҳуи Русия тавваҷӯҳ нахоҳад кард ва тарҳи Қонун доир ба забони давлатиро, ки дигар забони русияро забони муоширати байни миллатҳо намедонад, ба порлумон тавре ки ҳаст, хоҳад фиристод. Ислоҳ кардани тарҳу кӯтаҳ омадан таҳти фишори Русияву барои Раҳмону ҳукуматаш як шармсории азиме хоҳад буд, чӣ дар назди ҷомеаи Тоҷикистон ва чӣ дар арсаи байналмилалӣ. Ва далели ин гуфтаро дар як шарҳи хабаргузории давлатии Ховар метавонем, бубинем, ки аз забони як омӯзгор навиштааст, “вокуниши сиёсатмадорони Русия ба тарҳи Қонун доир ба забони давлатӣ мисли рафтори як мустамликадор аст, ки ба Тоҷикистон чун ба кишвари тобеъи Русия менигаранд.” Ин “омӯзгор” дар воқеъ ҳарфи давлати Тоҷикистонро мезанад, ки ба Русия мегӯяд, дигар “буққагӣ” ба кор намеояд, мо мӯҳтоҷи насиҳатҳои “бародаронаи” шумо нестем, мо медонем, чӣ кор мекунем. Аз ин аст, ки Эмомалӣ Раҳмон аз тарси танбеҳҳои Русия, ки содиркунандаи гандум ба Тоҷикистон ҳам ҳаст, аз мардум хостааст, ки маводи ғизоӣ захира кунанд, то дар оянда гурусна намонанд.

Эмомалӣ Раҳмон аз тарси рафтори Ислом Каримови золим, ки ба ӯзбакҳои худаш ҳам раҳм намекунад, аз мардум хостааст, то маводи ғизоӣ захира намоянд. Тоқати Ислом Каримов, ки нерӯгоҳи барқи обии Роғунро чашми дидан надорад ва ба дипломатҳои ғарбӣ гуфтааст, танҳо “через его труп” онро хоҳанд сохт, ба сар омадааст. Эмомалӣ Раҳмон дар баробари ғавғову суханрониҳои Ислом Каримову атрофиёнаш доир ба “зиёни зистмуҳитии Роғун” барои тамоми Осиёи Марказӣ худро ба карӣ андохта ва ҳамчунон бо ихтисоси пули ночизе ба сохтмони Роғун идома медиҳад. Ӯзбакистон, ки даҳонаш аз шикояту доду вой доир ба Роғун “мӯй баровард,” метавонад, ба иқдомоти амалӣ даст бизанад. Масалан бе ҳеҷ шаке метавон гуфт, ки дар инфиҷорҳо дар зери бинии мақомоти Тоҷикистон дар пойтахт дар шаҳри Душанбе, ки дар остонаи сафари раиси ҷумҳурони окистону Афғонистон ба эҳтимоли қавӣ нақши ангуштони Ӯзбакистон низ ҳаст. Маънии инфиҷорҳо чист? Барои дарки он зирак будан шарт нест. Маъниаш ин аст, "Тоҷикистон, ки дар назди қасри раиси ҷумҳураш бомб метаркад, чӣ гуна қодир аст, амнияти сармоягузори хориҷӣ дар даҳ қадам дуртарро таъмин кунаду нерӯгоҳ созад."

Барои Ислом Каримов гурусна гузоштани мардуми Тоҷикистон кори сахте нест, барои вай кофист, ки як "релси" роҳи оҳани самти Тоҷикистонро “каҷ карда” ва бо баҳонаи таъмири он ду моҳ нагузорад, то қаторҳои гандуму маводи ғизоӣ ба Тоҷикистон ворид шаванд. Эмомалӣ Раҳмон аз ҳамин тарсида ва аз мардум хостааст, ки гандум захира кунанд. Давлати Тоҷикистон, ки як даҳсола бештар ба дурӯғҳои Русия бовар кард ва акнун сарсахтии Ӯзбакистонро фаҳмид, акнун дарк кардааст, ки ҳоло ба ғайр аз худаш дигар касе ғами онро намехӯрад. Дер фаҳмид, бисёр дер фаҳмид ва ҳоло акнун ба мардуми Тоҷикистон, ки ғамашро то ҳол камтар мехӯрд, муроҷиат мекунад, ки дар ин рӯзҳои сахт дасти давлатро бигиранд. Яъне худкифо боша
нд ва нагузоранд, ки давлат дар назди Русия ва Ӯзбакистон зону бизанад.

Sunday, November 23, 2008

Бозгашт

Пас аз чанд мох дигарбора мехохам бинависам, саъй хохам кард, то ин сафхаи интернет
бехосил набошад.

Saturday, July 12, 2008

EMOMALI RAHMON REGRETS THAT HE LIED

Эмомалй Рахмон - раиси чумхури Точикистон, ки обруяшро батадрич дар миёни мардум аз даст медихад, дар як номаи расмй ба унвони мудири Сандуки Байналмилалии Пул (IMF) аз дуруггуихои хукуматаш ба ин созмон ибрози пушаймонй кардааст. Эмомалй Рахмон дар ин нома ваъда додааст, ки дигар хукуматаш ин кори шармоварро такрор нахохад кард( кош ба мардуми бечораи Точикистон низ чунин мегуфт). Мохи феврали соли равон Сандуки Байналмилалии Пул эълом кард, ки Точикистон (Tajikistan) барои карз гирифтан аз ин созмон борхо дуруг гуфтааст, яъне захирахои асъор ва тиллои кишварро беш аз хад нишон додааст, харчанд пуле ки Бонки Миллии Точикистон доштааст, хатто барои воридоти якмохаи маводи зарурй ба ин кишвар намерасидааст. Дар он замон IMF аз хукумати Точикистон хост бештар аз 49 миллион доллари ин созмонро пеш аз мухлат баргардонад ва хукумат бояд аввалин кисми ин карзро 3 руз пеш аз тачлили чашни истиклолият баргардонад. Зохиран ин рузи истиклолиятро Эмомалй Рахмон ба табъи чандон хуш тачлил намекунад. Эмомалй Рахмон (Rahmon) акнун ваъда додааст, ки тамоми корро бо Сандуки Байналмилалии Пул мекунад, то эътимоди сармоягузорону кишвархои донорро, ки хамеша аз онхо ба гуфтаи худаш барои "мардуми точик" пул мехохад, баркарор кунад. Аммо "шишаи бишкастаро пайванд кардан мушкил аст". Акнун хукумат хамрох бо Сандуки Байналмилалии Пул (IMF) хамкорй дорад, то ки фаъолияти Бонки Миллй (NBT) "дуруггуйи аслй" дар казия шафоф бошад. Фаъолияти онро ба зудй бояд аудиторхои хоричй тафтиш кунанд ва бар асоси кавли хукумат аз натичахои он бояд мардум низ огах карда шаванд.
Дуруггуйй ба Сандуки Байналмилалии Пул барои худи Эмомалй Рахмон дарди сар эчод кард, зеро бар асоси барномаи хамкорй бо IMF бояд Конун доир ба Бонки Миллии Точикистон ислох шавад ва Эмомалй Рахмон набояд дар хар интихоботе, ки "пируз" шуд раиси бонкро иваз кунад ва агар иваз кардани бошад, бояд бигуяд, ки сабаби сабукдуш кардани мудири Бонки Миллй чй аст. Дигар дарди саре, ки дуруггуйй барои хукумати Рахмон эчод кард, ин аст, ки бояд моликони тамоми ширкатхои молй ва сармоягузор, ки дар вазорати молия ва дигар идорахои Точикистон сабти ном шудаанд, ошкор шавад. Сохибони ин гуна ширкатхоро мардум медонанд, вале хукумат мегуяд, ки он гуфтахо овоза аст. Хукумат дуруст мегуяд, ки гуфтахои мардум "овоза" аст, харчанд "овоза" бошад хам, аммо хакикат аст. Агар хукумат ба ваъдааш вафо карда ва ин бор хам Сандуки Байналмилалии Пулро фиреб надихад, бояд то охири мохи сентябр аудиторхои хоричиро барои ширкат дар озмун барои тахкики фаъолияти "Барки Точик" ва "Талко", даъват кунанд, ки ба гуфтаи кормандони Сандуки Байналмилалии Пул захирахои азими мардуми камбизоати Точикистонро талаф додаанд ва ношафофии фаъолияташон мояи нигаронии амик мебошад. Тафтиши ин корхонахо бино ба гузориши Сандуки Байналмилалии Пул метавонад, пинхонкорихои дигарро ошкор кунад, ки ин вокеан зарбаи дигаре ба обруи хукумати Эмомалй Рахмон хохад буд, ки Талко ва Барки Точик ба у итоат мекунанд. Аммо боз хам Сандуки Байналмилалии Пул зохиран итминон надорад, ки мегуяд, макомоти давлатй бояд дар тахкику тафтиши ин корхонахо ва дигар фаъолиятхои идорахои хукуматй хамкорй кунанд вагарна, боз хамон хурдани хакки мардуми точик ва фасодкорй дар сатхи болои хукумат бокй хохад монд. Хабарнигорони азизи точик гузориши Сандуки Байналмилалии Пул барои пайгирии он ки хукумат то кучо ба ваъдахоя вафо мекунад, як рахнамои хубе барои шумо хохад буд. Гузориши Сандуки Байналмилалии Пул ва номаи пушаймонии Эмомалй Рахмон инчост.
http://imf.org/external/russian/pubs/ft/scr/2008/cr08197r.pdf

Saturday, May 31, 2008

THE FIRST OFFICIAL NEWS ABOUT HASAN

Саъйи Ховар барои фуру нишондани сару садохо доир ба марги Хасан Асадуллозода:

Душанбе, 31 май. (АМИТ «Ховар», Покиза Маҳмадбекова). - Дар давоми се ҳафтаи охир, бо мақсади вусъат додани ҳамкориҳои минбаъда ва таҳкими равобит, вохӯриҳои Раиси ҶСК «Ориёнбонк» Ҳасан Асадуллозода бо роҳбарони ташкилотҳои давлативу байналхалқӣ, сохторҳои тиҷоратие, ки мизоҷони бонк мебошанд, баргузор гардиданд.
Дар ҷараёни вохӯриҳо, ҷонибҳо вазъи равобити тарафайнро ҳамаҷониба таҳлил намуда, фикру мулоҳиза ва пешниҳодоти худро чиҳати дар оянда боз ҳам беҳтар гардонидани хизматрасонии бонкӣ ва ворид кардани намудҳои нави хизматҳое, ки хароҷотро кам карда, барои афзоиши даромадҳои онҳо мусоидат менамояд, барои баррасӣ пешниҳод намуданд.
Чунин вохӯриҳо дар оянда низ ба роҳ монда шуда, баҳри вусъатёбӣ ва ҳавасмандгардонии муносибатҳои молиявӣ-қарзии байни бонкӣ ва мизоҷони он бо роҳи амалигардонии лоиҳаҳои муштараки хурду бузурги соҳаи қарздиҳӣ ва маблағгузории тиҷоратӣ, мусоидат менамоянд.
Ҳамзамон мизоҷон имконият пайдо менамоянд, ки имконоти бештари рақобатпазири маблағгузориро барои хизматрасонии равандҳои тиҷоратию корчаллонӣ ба даст оранд.

Бовар мекунед?

Friday, April 18, 2008

ХУШДОРИ РАХМОН АЗ РАСИДАНИ КИЁМАТ

Имруз телевизиони Точикистон Эмомалй Рахмонро намоиш дод, ки аз газаб
лабонаш меларзид ва ба зердастонаш амр медод, ки хар кори мумкинро кунанд ва дар хар вачаб замин галладона кишт кунанд, зеро ба гуфтаи раиси чумхур Эмомалй Рахмон "киёмат ва кахтй мерасад". Эмомалй Рахмон асабонй буд, нихоят асабонй буд ва мегуфт, ки омадани малаххо тавре кухансолон мегуянд, нишонаи киёмату кахтй аст. Вай малаххоро гунахкор кард, ки вазъи кишоварзону арсаи кишоварзиро бад кардаанд. Аммо нагуфт, ки сиёсати нодурусти уву атрофиёнаш холи кишоварзону арсаи кишоварзиро табох кардааст. Сиёсати хукумати Рахмон буд, ки хочагихои пунбапарвараш кариб ним миллиард доллар карздор шудаанд, сиёсати нодурусти хукумат буд, ки дигар мардум ба пули ба хуни чигар ба дастовардаи мухочирони кории Русия одат карда (танбал шуда) ва аз кишти зироат дар заминхои "президентй" даст кашиданд ва тавлиди гандуму дигар анвоъи зироат кам шуд. Беэътиноии вазорати кишоварзии хукумати Рахмон буд, ки нишонахои ба гуфтаи раиси чумхур, "киёмат" яъне малаххо барномаи танзими оиларо сарфи назар карда, дар киштзорхо бехисоб зойиданд. Хукумат акнун ба ояндаи дуртар меандешад, ки аз омадани "киёмат" дурустараш нооромихои ичтимой чилавгирй кунад, вале агар аз пеш ба ояндаи дур меандешид, малаххо ба ин андоза часур намешуданд ва хукумати Рахмону мардумро наметарсониданд.

Saturday, April 12, 2008

РӮЗҲОИ САХТИ ҲУКУМАТИ ТОҶИКИСТОН

Имрӯзҳо дар садои мансабдорони олирутбаи ҳукумати Тоҷикистон дигар он итминони солҳои пеш эҳсос намешавад, баръакс садои онҳо ҳоло як андоза меларзад ва эҳсоси тарси онҳоро ҳам аз суханрониҳояшон ва рафторашон дидан мумкин аст.

Худи Эмомалӣ Раҳмон - раиси ҷумҳури Тоҷикистон рӯзи 19 март дар рӯзҳои Наврӯз, ки ваҳшати сахтиҳои зимистони қаҳратун ва бебарқу газ дар ёди мардум буд, зимни мулоқот бо аҳли зиё дар Душанбе аз хабарнигорони тоҷик даъват кард, ки ба гуфтаи вай “аз чопи маводҳое худдорӣ намоянд, ки боиси рӯҳафтодагӣ ва навмедии мардум гардида, вазъи ҷомеаро ноором месозанд”.Манзур зоҳиран ин аст, ки мардум рӯҳафтода ва хашмгин шудаанд ва онҳоро бо мақолаҳои танқидии хеш якбора ба зидди ҳукумат нашӯронед.

Дигар нишонаҳои тарси мансабдорон муроҷиатҳои “дӯстонаи” онҳо ба рӯзноманигорон аст, ки аз навиштани мақолаву таҳлил доир ба бесалоҳиятии мақомот ва оҷизии онҳо дар ҳалли мушкиле худдорӣ варзанд. Баъзе дӯстони хабарнигорам гуфтанд, ки ҳатто аз вазорати умури хориҷаи Тоҷикистон ба расонаҳои хориҷӣ, ки ошкортар доир ба вазъи кишвар менависанд, муроҷиат карда ва гуфтааст, ки ҳукумат кори хуб ҳам мекунад, чаро шумо аз онҳо чашм мепӯшед, зеро мардум баъди шунидани гузоришҳои шумо ба мақомоти давлатӣ нома менависанд, ки чаро шумо ба мушкилоти мардум расидагӣ намекунед.

Ҳукумати Тоҷикистон бояд битарсад, зеро зимистони гузашта, ки мардуми Тоҷикистонро қариб аз сардӣ кушт (кудаконашонро дар бемористонҳо кушт ва бештар аз 200 нафарро) ва оҷизии ҳукумат дар ҳалли мушкилоти мардумро нишон дод, мардумро аз ҳукумат дилсард кардааст. Агар як солу ду соли пеш дар рустоҳои Тоҷикистон ҳукумат ва бахусус Эмомалӣ Раҳмон маҳбубияти зиёд дошт ва агар як рустоии оддиро мепурсидед, ки доир ба ҳукумат чӣ андеша дорад, мегуфт, ки “Эмомалӣ Раҳмон мардаки хуб аст”, аммо ҳоло ба ин суоли худ комилан ҷавоби баръакс хоҳед гирифт.

Ҳукумати Тоҷикистон баҳона барои тарсидан дорад, зеро парвози қиммати маводи ғизоӣ бахусус орд, хашми мардуми нимгуруснаи Тоҷикистонро барангехтааст. Ба гуфтаи Барномаи ғизои Созмони Милал қимати орд дар бозорҳои Тоҷикистон то 70 дарсад, гандум – 128 дарсад ва равған – 126 дарсад боло рафааст. Ҳукумати Тоҷикистон медонад, ки қиматҳо дар ояндаи наздиктар ҳам ба сӯи боло ҳаракат хоҳанд кард, зеро дар хориҷ низ раванд чунинаст. Ва агар ҳукумати Қазоқистон онгуна ки гуфтааст, ба хотири пешгирӣ аз афзоиши қиммати гандум дар дохил содироти ғалларо маҳдуд кунад, дар он ҳолат вой бар ҳоли мардуми Тоҷикистон ва ҳам вой бар ҳоли ҳукумат. Намояндагони давлат дар нишастҳои корӣ бо намояндагони кишварҳои донор ва муассисаҳои хайрия гуфтаанд, ки аз он метарсанд, ки эҳтимол имсол ду миллион нафар мардуми Тоҷикистон нимгурусна хоҳанд буд.

Аз ин аст, ки Эмомалӣ Раҳмон ҳанӯз дар аввалҳои баҳор аз мардум хост, ки ҳар қадар ки метавонанд, ғалладона кишт кунанд. Яъне зӯратон ба харидани ғалладонаи воридотӣ нахоҳад расид. Танҳо чанд рӯз пештар низ Эмомалӣ Раҳмон дастур дод, то муассисаҳои кишоварзии давлативу ғайридавлатӣ феҳраси заминҳоеро, ки ду маротиба кишт хоҳанд шуд, дар ихтиёри ҳукумат гузоранд.

Ҳамингуна рӯзҳои тарснок барои ҳукумати Тоҷикистон дар пешанд ва мақомот аз ин ба хубӣ огаҳ ҳастанд (албатта на ҳамаи онҳо, зеро агар доир ба ояндаи дуртар меандешиданд, гирифтори чунин дарди сарҳое намешуданд). Ҳукумат акнун огоҳ аст, ки маҳбубияташ дар байни мардумро ба тадриҷ аз даст медиҳад. Ҳарчанд миллати тоҷик пурсабру таҳаммул аст ва мисли мардум дар Ҳаитӣ ва Бангладеш барои боло рафтани қиммати маводи ғизоӣ ба қароргоҳҳои ҳукумат ҳамла намекунад, аммо миллати тоҷики фарзандӯстдор, бидуни шак гиряи фарзанди гуруснаашро таҳаммул намекунад. Гиряе, ки шунидану таҳаммул карданаш бисйор сахт аст.

Sunday, April 6, 2008

Tajik government's lies

Ҳукумати Тоҷикистон баъди панҷуми март меҳмонҳои зиёдеро пазироӣ кард, ки сӯҳбат бо онҳо барои мақомоти олирутба, аз ҷумла раиси ҷумҳур Эмомалӣ Раҳмон чандон осон набуд. Баъди панҷуми март, гуфтугӯҳои меҳмонон аксаран доир ба он буд, ки чӣ гуна ҳукумати Тоҷикистон тавонистааст, зимни ҳамкориҳо бо созмонҳои байналмилалӣ дурӯғ гӯяд. Ин меҳмонон аз ҷумла, Шигео Катсу муовини мудири Бонки Ҷаҳонӣ ҳангоми мулоқот бо Эмомалӣ Раҳмон – раиси ҷумҳури Тоҷикистон зоҳиран гуфт, ки фиреб додан ҳангоми ҳамкориҳо чизи хубе нест, зеро эътимод аз байн меравад ва сармоягузорон, ки пули худро бисёр эҳтиёт мекунанду дӯст медоранд, ба кишварҳои дурӯғгу пул намедиҳанд.
Дар баёнияи Бонки Ҷаҳонӣ гуфта мешавад, ки зимни сӯҳбат бо Эмомалӣ Раҳмон "имконот барои боло бурдани ҷалби сармоя ба Тоҷикистон" баррасӣ шудааст, ки ин маъниро ҳам медиҳад, бояд аз ин пас дурӯғ нагуед ва бо шарикони худ самимӣ бошед.Панҷуми март зоҳиран дар ёди Эмомалӣ Раҳмон абадан нақш хоҳад баст, зеро дар ҳамин рӯз Сандуқи Байналмилалии Пул эълом кард, ки Тоҷикистон дарёфти қарз, дар ихтиёри ин созмони молӣ "иттилоъоти нодуруст" гузоштааст, агар дипломатияро як тараф гузорем, яъне "дурӯғ гуфтааст.
Бонки Миллии Тоҷикистон аз соли 2000 то соли 2004 барои қарз гирифтан, аз Сандуқи Байналмилалии Пул худро сарватманд нишон додааст, яъне гуфтааст, ки захираҳои арзиву молии кофӣ дорад, ки дар сурати сар задани бӯҳроне масалан тамом шудани маводи ғизоӣ дар Тоҷикистон барои воридоти семоҳа истифода барад.Ва ба гуфтаи Люк Мойерс намояндаи Сандуқи Байналмилалии Пул ҳукумати Тоҷикистон на як бору ду бор балки шаш маротиба дар ихтиёри ин созмон "иттилоъоти нодуруст", аниқтараш "дурӯғ” гузоштааст.
Бо гузашти як моҳ аз эъломи Сандуқи Байналмилалии Пул, мақомоти кишварҳои хориҷӣ ва созмонҳои байналмилалӣ Эмомалӣ Раҳмонро ором нагузоштанд ва рӯзи дуввуми апрел қоиммақоми муовини вазири умури хориҷаи Амрико дар умури Осиёи ҷанубӣ ва марказ Памела Спратлен ҳам ин мавзӯи нороҳаткунандаву ҳиҷолатовар ба миён кашида гуфт, ки дурӯғгуиҳо обрӯи ҳукумати Тоҷикистонро дар арсаи байналмилал резонда ва сабаби кам шудани эътимод ба ҳукумат шудааст. Ва Тоҷикистон аз ҳоло меваҳои "ширини” иттилоъотҳои нодуруст ва дурӯғгуиҳоро мечашад.
Бонки Рушди Осиё, рӯзи дуввуми апрел эълом кард, ки барномаҳояш дар Тоҷикистонро маҳдуд мекунад. Ин созмон ҳам аз дипломатия кор гирифт ва гуфт, ҳаҷми сармоягузориҳо коҳиш нахоҳад ёфт, вале чанд арсаи махсус барои сармоягузорӣ интихоб хоҳад шуд. Вале дар нишасти хабарии Бонки Рушди Осиё як хабарнигори зираке дар Душанбе ёфт нашуд, ки бипурсад, чаро маҳз имсол чунин тасмим гирифтед ва чаро ин корро пештар накардед. Аммо бепосух ба ин суол ҳам рӯшан аст, Бонки Рушди Осиё, ки ба хотири мардуми бечораи Тоҷикистон миллионҳо долларро дар ихтиёри ҳукумат гузоштааст, мехоҳад бигӯяд, ки дигар аз Бонки Рушди Осиё он саховатмандии пешинаро интизор набошед.
Табиист, ки созмонҳои дигари моливу кишварҳои кӯмакрасон бо назардошти фиреби Сандуқи Байналмилалии Пул аз ин пас мулоҳиза хоҳанд кард, ки меарзад дар Тоҷикистон сармоя гузорем ва ё ба ҳукумати он кӯмак кунем. Албатта бо назардошти манофеъи худ онҳо кӯмакҳое дар ихтиёри Тоҷикистон хоҳанд гузошт, аммо рафторашон мисли падаре хоҳад буд, ки баъди дархости писараш барои пул, ба ҳамёни худ дурудароз назар мекунад, аввал пули калонтар, сипас миёна ва дар ниҳоят чанд тангаро ба писараш дода ва огоҳ мекунад, ки пулро дуруст сарф кунад.
Бале дигар ҳар сармоягузору донор пеш аз шунидани номи Тоҷикистон ҳатман қазияи фиреби Сандуқи Байналмилалии Пулро ба хотир оварда ва сипас рафтор мекунад.Барои он ки дигар созмонҳои кӯмакрасон ва донорҳои Тоҷикистон саховатмандона бо ин кишвар рафтор кунанд (ҳарчанд саховати зиёде ҳам то кунун нишон надодаанд) бояд ҳукумати Тоҷикистон ҷидду ҷаҳд намояд, то ба гуфтаи Мӯҳсин Хон – мудири бахши Ховари Миёна ва Осиёи Марказӣ дар Сандуқи Байналмилалии Пул эътимод ба худро барқарор намояд.
Ҳукумати Тоҷикистон низ инро ба хубӣ мефаҳмад ва ҳам онро мефаҳмад, ки ҷомеаи ҷаҳонӣ дар бораи он чӣ фикр мекунад, яъне агар ҳукумат қодир ба нотарсона фиреб додани созмонҳои байналмилалӣ бошад, пас мардуми худро ҳам ҷасурона фиреб медиҳад. Ҳукумат боз ҳам мефаҳмад, ки акнун чӣ гуна ҷалби сармоя барои бунёди нерӯгоҳи барқи обии Роғун, (ягона умеди ҳукумат) барояш сахттар хоҳад шуд, ҳарчанд то кунун ҳам зораву илтиҷоҳои он аз сармоягузорон самаре надодааст.